सर्लाहीको बरहथवामा एक आमा र उनका दुई छोराछोरी आफ्नै घर भित्र मृत फेला परेका छन् ।

बरहथवा नगरपालिका–१, हजरिया निवासी शिव हजारीकी श्रीमति कविता हजारी घर भित्रै झुण्डिएको अवस्थामा मृत फेला परेकी हुन् भने उनका ६ वर्षीया छोरी र ४ वर्षीय छोरा पनि सोही घरभित्र मृत फेला परेका हुन् । आमा कविताको शव झुण्डिएको अवस्थामा तथा दुईजना बच्चा पनि घर भित्रै भुईँमा लडिरहेको अवस्थामा मृत फेला परेको जिल्ला प्रहरी कार्यालयले जनाएको छ ।

‘छेउछाउमा विषादिका बोतल पनि नदेखिएकाले दुईवटा बच्चाको मृत्यु एवं आमाको आत्महत्या बारे गम्भिर ढंगले अनुसन्धान भईरहेको छ’, जिल्ला प्रहरी कार्यालय मलंगवाका प्रवक्ता प्रहरी नायब उपरीक्षक माधवप्रसाद बुढाथोकीले उज्यालो अभियानसँग भने, ‘पोष्टमार्टम रिपोर्ट नआई हत्या वा आत्महत्या केही भन्न सक्ने अवस्था रहेन ।’

आईतबार बिहान ५ बजेतिर तीनैजना मृत अवस्थामा फेला परेको प्रहरीले जनाएको छ । मृतकहरुको शव पोष्टमार्टमका लागि सदरमुकाम मलंगवा स्थित जिल्ला अस्पताल ल्याईएको छ । प्रहरीका अनुसार मृतकहरुका अभिभावक शिव हजारी भने वैदेशिक रोजगारीका सिलसिलामा विगत ४ वर्षदेखि मलेसियामा रहेका छन् । घटनाबारे गम्भिर ढंगले अनुसन्धान भईरहेको जिल्ला प्रहरी कार्यालयले जनाएको छ ।